Ingredientes pa dos persones:
mediu kg de brócoli
mediu kg de patates
1 cebolla
1 l de agua o de caldo de verdures
sal
cominu
aceite
pimienta molío (meyor de lo blanco)

Móu de preparación:

Garramos esa pota a presión que me da la vida y destapada echamos-y dos cucharaes d'aceite y cuando tea calentino echamos un poquitín de cominu (muncho non, pa nun refalfiar y esperamos a que dore. Piques la cebolla piquiñino y añades un pizcu de sal cuando tea el comino, lluéu esperes a que dore la cebolla y se ponga blandina, entos eches en trozos el brócoli y la patata, col agua (meyor si tienes caldo de verdurines que da más sabor)y tapes la pota, dexándolo facese de 10 a 12 min.

Pa finar sácase, pásase too pola batidora, ponse-y sal, pimienta al gustu y sírvese calentino. Como diría mio pá, ta como Dios, pero eso sí, pa estómagos apetitosos merez un segundu platu pa poder fartar.


Esta receta, aunque ta un pelín modificada, atopela na rede na páxina http://eldelantalverde.wordpress.com/

¡Y nun sabéis l'ésitu que tuvo en casa!

Ingredientes pa 4 persones:

400 gr d'espaguetis
Aceitunes rellenes d'anchoa
200gr de champiñones
3 guindilles
2 dientes d'ayu
Albahaca
Oréganu
Sal
Aceite d'oliva

Ellaboración:

Lo primero ye poner l'agua a ferver con un puñáu de sal, un chorrín d'aceite y yerbes aromátiques al gustu. Mentanto facemos eso, picamos l'ayu, les aceitunes y los champiñones.
Una vegada que l'agua ruempa a ferver, metemos los espaguetis y removémoslos. Calentamos un poquiñín d'aceite nuna sartén y doramos l'ayu y la guindilla, lluéu, echamos los champiñones y un par de minutinos dempués les aceitunes. Cuando los espaguetis tean nel so puntu, escurrímoslos y echámoslos na sartén xunto col restu ingredientes, removemos a fuéu lento y sirvimos.

Nesta xera bloguera y culinaria, voi contar cola collaboración de xente amigo a la que tamién-y presta arremangase na cocina. Como Laura, que yá me pasó unes cuentes recetes. Si daquién s'anima, pué unviar les suyes. Les que nun seyan míes llevarán el nome del autor o autora xunto al títulu de la entrada.

Ingredientes pa dos persones:

1 trozu grande de calabaza (unos 250 gr)
1 calabacín
1 cenahoria
1 patata mediana
un poco apiu
un cuartu de puerru
una ramina perexil
agua
sal

Y si quiés un toque diferente...dos quesinos tipo El Caserío y un poco de canela en polvo.

Mou de preparación:

Nun lo hai más fácil. Lávase too, quitáse-y la piel a la calabaza y a la patata y pártese too en trozos. Lluéu métese na olla a presión (nun vivo ensin ella) echando-y agua hasta cubrir y déxase allí diez minutinos o doce dende que entame a pitar. Cuando acabe escúrrese col chino o la espumadera (ensin tirar el caldo) y pásase pola batidora, añandiéndo con una garciella caldo hasta algamar la testura deseada.

Quien quiera da-y un toque diferente pue facer como la mio hermana Laura y echa-y dos quesinos a la hora de batilo, o espolvorear el platu al servilu con un toque de canela en polvo tal y como me enseñó Sergi en Barcelona.

Un platu perfácil, persanu y persabrosu, al que nun pué falta-y el pan.

Ingredientes por persona:
2 güevos
2 setes (meyor fresquines)
ayu (meyor en polvo)
yerbes provenzales
sal
aceite


Mou de preparación:
Sofreímos les setes col ayu y dempués añadimos les yerbes provenzales. Batimos los güevos echando-yos un poco sal y cuando les setes tean dorando xuntámoslo na sartén pa facer la tortiella.

Ye mui prestoso acompañar la tortiella con guarnición.

Ingredientes pa dos persones:
1 pocillu de garbanzos por persona (tán más ricos los piquiñinos)
mediu ayu puerru
una cenahoria
media rama d'apiu
un diente d'ayu
media cebolla
mediu pimientu verde
1 poquiñín de llaurel
aceite
pimentón
sal al gustu

Mou de preparación:
Ponense los garbanzos a remoyar n'agua templadino tola nueche, con un poco de sal. A la hora de facelos, métense nuna pota hasta que col primer fervor saquen tola espluma. Esa espluma quítase cola esplumadera y añádense un poquiñín d'aceite, sal y llueu la cenahoria, el puerru, l'apiu y el pizquín de llaurel, too ello mui picadino (menos el llaurel, que se pue quitar llueu). Tradicionalmente dexábase too cocer hora y media, pero pa la xente que trabayamos fuera de casa ye más eficaz metelo na olla a presión diez o doce minutinos. Mentanto se fai, nuna sartenuca fáise un sofritu col ayu, la cebolla y el pimientín, too tamién bien picadino, que na cocina hai que picar más qu'en María Luisa. Cuando tea preparao, ponémos-y el pimentón (enantes non, pa que nun queme)y remuévese cola cuyar de madera. Dempués añádese'l sofritu a la olla cuando ésta acabe y too xunto déxase cocer unos diez minutinos más. Llueu yá ta pa servir.

Nestos díes de ñeve ye un mou de comer rico, sano, ensin grasa y déxate el cuerpu bien calentín. ¡Buen provechu!

¿Quién soi?
Eli, muyer, 29 años, asturiana, trabayaora, vivo en pareya y soi madre adoptiva de una perrina llamada Telva.

¿Cómo me defino respeuto a la comida?
Agora mesmo soi pescetariana, o lo que ye lo mesmo, nun como nada que camine per tierra o vuele, solamente vexetales, peces y mariscos.

Entamé dexando la carne roxo, lluéu tamién el pollu y otres aves, agora yá nun como tampoco embutidos y similares. Supongo que l'escalón final ye quedame nel pescetarianismu o faceme vexetariana.

¿Por qué un cambiu de hábitos alimenticios?
Por razones étiques, medioambientales y de salú...¿quién da más?

¿Por qué un blogue?
Toi afondando nel universu de la cocina pa meyorar la mio alimentación y algamar una variedad que compense la falta d'inxesta de carnes y, si nun lo apunto, escaezo toles recetes que me cuenten o que m'invento.

Nesta xera bloguera y culinaria, voi contar cola collaboración de xente amigo a la que tamién-y presta arremangase na cocina. Como Laura, que yá me pasó unes cuentes recetes. Si daquién s'anima, pué unviar les suyes. Les que nun seyan míes llevarán el nome del autor o autora xunto al títulu de la entrada.

Bienveníos/es y buen provechu.